Views 1687

Le Glamour Grotesque é o novo proxecto musical do Dr. Painkiller (o diabólico irmán deforme de Marcos Payno). No seu segundo álbum, “Dangerous Club” o doutor contou ademais coa colaboración de membros igualmente grotescos doutras bandas galegas como Tomás Axeitos de A Compañía do Ruído, Abraham “El Niño” de Lamatumbá, ou Denís Mutante e Manuel Payno de GalegoZ.

A súa proposta é unha mistura de techno, trip-hop, ambient, abstract hip-hop, drum n’ bass… tal diversidade de estilos e sensacións fai que sexa unha música ideal para acompañar calquer actividade: bailar, traballar na oficina, sachar na leira, cortarse as veas, facer “footing”, limpar a casa, construír robots xigantes, xogar ó pádel, preparar cócteis molotov, xogar cos gatos, facer rituais de Maxia e manter relacións sexuais (só ou acompañado).

Le Glamour Grotesque é unha ciber-feira de monstros, un circo lisérxico, unha tecno-orquestra demente que tanto pode adicar os seus temas ás revolucións mais fermosas coma ós mitos universais da imaxinería pop (Godzilla, Harry o Suxo, monseñor Rouco… ).

Le Glamour Grotesque é unha célula autónoma do Perverso Colectivo, unha organización secreta que pretende lavar o cerebro á xuventude para acadar a dominación mundial, o colapso das relixións monoteístas, a destrucción da cultura occidental e a supremacía dos freaks. E todo isto, sen deixar de bailar.

Podes descargar os seus dous traballos “Vinte e cinco” e “Dangerous Club” de forma totalmente gratuita en www.aregueifa.net.

Users' Comments (0)

Engade o teu komentario