Views 1980

O Leo i Arremecághona!!! é un cantautor punk (kañautor) en galego que comeza a levar o seu espectáculo Suspiros de kaña polos escenarios en 1998, cando grava o seu primeiro disco. Nese mesmo ano foi abreconcertos da Xira Galega de Albert Pla, en que presentaba o disco Veintegenarios.

A partir daquela levou o seu espectáculo músico-teatral por escenarios de Galiza e de Euskadi, ademais de colaborar como músico e actor con compañías como A Factoría Teatro, no espectáculo As Presidentas, e Berrobambán Teatro, en Vendetta, funcións en que tamén foi responsable da banda sonora.

O seu espectáculo Suspiros de kaña consiste nunha performance strip-tease, en que se vai desprendendo dun traxe de faralaes de folclórica andaluza até quedar espido (ou case), mentres debulla unha lista de cancións cuxo fío condutor é a colonización lingüística, cultural e política de Galiza por parte do Estado español.

Cando se lle piden referencias musicais menciona dende Suso Vaamonde a Iron Maiden, pasando polos seus adorados Metallica (o nome da banda virtual de acompañamento Arremecághona!!! é unha homenaxe ós pais do Speed Metal), Iggy & The Stooges, Lou Reed, etc. Así a todo, o público en xeral relaciónao máis ben con Jonathan Richman, Billy Bragg, Albert Pla, Pau Riba ou Manolo Kabezabolo.

Entre os seus proxectos a curto prazo están a reedición electrónica do seu disco Suspiros de Kaña, así como a edición audiovisual de Sigho (Vivo)!, escolma de rexistros audiovisuais do seu espectáculo en directo, ou o disco Aghomita, campión!, en que vai colaborar con todo tipo de acompañamentos, dende bandas de música ata dilleis, todo baixo licenza Creative Commons.

Users' Comments (2)

Engade o teu komentario